كل سنة وإنتي طيبة يا زوزو

إمبارح كان عيد ميلاد الرائعة سعاد حسني علشان كده حبيت أشارككم في شوية من رباعياتي المفضلة لصلاح جاهين

إنشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
!!عجبي

فتحت شباكي لشمس الصباح
ما دخلش منه غير عويل الرياح
وفتحت قلبي عشان أبوح بالألم
ما خرجش منه غير محبة وسماح
!!عجبي

أنا الذي عمري اشتياق في اشتياق
وقطر داخل في محطة فراق
قصدت نبع السم وشربت سم
من كتر شوقي وعشمي في الترياق
!!عجبي

حبيت...لكن حب من غير حنان
وصاحبت لكن صُحبه مالهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
!!عجبي

إيش تطلبي يا نفس فوق كل ده
حظك بيضحك وانتي متنكدة
ردت قالت لي النفس: قول للبَشَر
ما يبصوليش بعيون حزينة كده
!!عجبي

بحر الحياه مليان بغرقى الحياه
صَرَخت خش الموج في حلقي ملاه
قارب نجاه!...صَرَخت قالوا مفيش
غير بس هو الحب قارب نجاه
!!عجبي